“Want dit is God wat julle gewillig en bekwaam maak om Sy wil uit te voer.”
– Filippense 2:13

Het jy al ooit gewonder waarom jy hier is? Ek bedoel, regtig gewonder waarom jy op aarde is?

Niemand sê ooit:
“Daar is nie regtig ’n rede nie. Toe ek vanoggend wakker word, was ek maar hier in die winkelsentrum. Kan jy vir my sê hoekom ek hier is?”
Tensy hulle aan geheueverlies ly.

Op ’n stadium in my geestelike worsteling het ek die boodskap duidelik gehoor:
Neem net vir Jesus as jou Saligmaker aan, en al jou probleme verdwyn soos mis voor die son.

Maar so stadigaan het die realiteit my egter getref. Mense se probleme verdwyn nie soos mis voor die son nie. My eie “issues” is nog daar. Die kerkmense se “issues” bly hardnekkig vassteek. Die kerk is vol siek mense! En die mense in die kerk bly siek.

“As julle kwaad word, moenie sondig nie, en moenie ’n dag kwaad afsluit nie. Moenie die duiwel vatkans gee nie.”
– Efesiërs 4:26–27

Het jy al ooit gewonder hoekom God ons so aanmekaar gesit het dat ons kan kwaad word? Woede kan so vernietigend in verhoudings wees. Hoekom het God ons gemaak om te kan woedend raak?